Жеке кәсібі мен жұмысын қатар алып жүрген кәсіпкерлер міндетті медициналық сақтандыруға екі рет – жалақысы мен қызметінен түскен табысынан жарна төлеуге мәжбүр. ШҚО Кәсіпкерлердің құқығын қорғау кеңесінде осы тақырып талқыға салынды. Кеңес мүшелерінің айтуынша, бұл әділетсіздік. Себебі олар басқалар сияқты жалпы негіздегі медициналық қызметтерді пайдаланады.
— Мәселен, кретивті индустрияда табыс тұрақсыз. Кей айларда табыс мүлде болмайды. Бірақ сонда да сақтандыруға ақша төлеу міндетті, — дейді кәсіпкерлер.
Ал Әлеуметтік медициналық сақтандыру қорының облыстық филиалынан қолданыстағы заңнамаға сәйкес кірістің барлық түрінен жарна төленетінін еске салды.
— Бірнеше жерде жұмыс істейтін азамат барлық табысы бойынша жарна төлейді, бірақ сома 17 мың теңгеден аспауы керек. Әлеуметтік жүйеде барлығы тең болуы қажет, — дейді филиал директорының орынбасары Ирина Степанова.
Алайда Шығыс Қазақстан облысының Кәсіпкерлер палатасынан бұл норма әуел бастан-ақ жөнге келтірілмегенін алға тартты. Бұған дейін арнайы салық режиміндегі жеке кәсіпкерлер – такси жүргізушілері мен курьерлер міндетті медициналық сақтандыру төлеушілер қатарынан шығарылған болатын.
— Жалдамалы жұмыс істейтін кәсіпкерлерді де сақтандыру төлемінен босату керек деп есептейміз. Оның үстіне келесі жылы олардың салық жүктемесі бәрібір артады, — дейді палатаның бөлім басшысы Алыстан Маратов.
Кәсіпкерлер «Атамекен» Ұлттық кәсіпкерлер палатасы арқылы медициналық сақтандыру туралы заңға өзгерістер енгізуді ұсынды. Олар жүйеде жұмысшы әрі кәсіпкер ретінде тіркелген жеке кәсіп иелерінен енді қос жарна алынбауды талап етіп отыр.