Өңір бойынша туберкулезбен ауырғандар саны азайып келе жатыр. Бұл туралы ШҚО фтизиопульмонологиялық орталығының стационарлық қызмет және профилактикалық жұмыс жөніндегі басшысының міндетін атқарушы Болатбек Елшібеков мәлім етті.
— Туберкулезбен ауырғандар саны 37,9%-ға, оның ішінде балалар арасындағы аурушаңдық 62,5%-ға азайды. Бұл жетістіктер медициналық ұйымдардың мақсатты жұмысының арқасында мүмкін болып отыр. Олар ауқымды профилактикалық тексерулер өткізіп, тестілеуге қолжетімділікті арттырып, заманауи диагностикалау және емдеу әдістерін енгізді, — деді ол.
Қазақстанда 24 ақпан мен 24 наурыз аралығында туберкулезбен күрес айлығы өтті. Ол Дүниежүзілік туберкулезбен күрес күніне арналып ұйымдастырылған. Бұл шаралар аясында туберкулездің алдын алу, оның симптомдары, ерте диагностикасының маңызы туралы халықты ақпараттандыру жұмыстары жүргізілді. Мамандар қазіргі заманғы зерттеу және емдеу әдістері туралы айтып, дәріге сезімталдықты тексерудің маңыздылығына назар аударды.
