Бүгін облыс әкімдігінің отырысында Өскемен қаласын және өңірдің басқа да елді мекендерін көгалдандыру мәселесі сөз етілді. Табиғи ресурстар және табиғатты пайдалануды реттеу басқармасының басшысы Арман Есентаевтың айтуынша, бүгінгі таңда егілген ағаштардың жапырақ жаймай жатқаны туралы арыз-шағымдар көптеп түсуде.
— Көшеттер өспей қалмас үшін қай жерде және қай өсімдіктердің тамыр алып, жақсы өсетінін нақты түсіну қажет. Ол үшін аймақтың дендрологиялық картасын жасаған абзал, — деді ол.
Ендігі мәселе осы жобаны қаржыландыруда. Сондай-ақ аймақ басшысы Нұрымбет Сақтағанов облыстағы өнеркәсіптік кәсіпорындардың айналасында жасыл аймақтар құру, сол арқылы оларды «Таза Қазақстан» бағдарламасына қатысуға тарту қажеттігін атап өтті.