Өскемен көшелерінде құжынаған иттер мәселесі әлі де шешімін табар емес. Иттер бірнеше шағын аудан халқын үрейлендіріп отыр. Бірақ иттерді қорғап жатқандар да көп.
— Күн сайын қала тұрғындары бізге хабарласып, қаңғырған иттердің қаптап кеткеніне наразылық білдіріп жатады. Жануарлар құқығын қорғаушылардан да шағымдар түсуде. Мәселен, біздің мамандар шағын аудандарға барғанда басқа біреулер атып кеткен иттерді табады. Әлбетте, олар өлекселерді жинап алады. Сол кезде қолына камера ұстаған адамдар атып шығып, «иттерді атып жатыр» деп байбалам салады. Өскеменде дәл осындай 10 оқиға болды. Қазір сол бойынша тергеу басталды, — дейді Шығыс Қазақстан облысының ветеринария басқармасының басшысы Рамиль Сағандықов.
Өткен жылы көше кезген иттердің тым көбейіп кеткені жайлы тұрғындардан 2 мыңнан астам шағым түсті. Бүгінде күн сайын иттерді атуға кем дегенде 5 адам өтініш білдіруде. Кейбіреулер тіпті далаға шығуға қорқатындықтарын айтып жатыр.