Өскемен қаласында ауа сапасына қатысты тексеру жүргізіліп, зиянды заттардың рұқсат етілген шектен асып кеткені анықталды.
Кеше Шығыс Қазақстан облысы Экология департаментінің мамандары, «Өскемен тынысы» экологиялық бюросының өкілдері және «Байтақ» партиясының ШҚО филиалының мүшелері Өскеменде ауа сапасын тексерді.
— Қала бойынша қолайсыз метеорологиялық жағдай жарияланған. Соған байланысты солтүстік аудандардағы өнеркәсіптік нысандардың санитарлық-қорғау аймақтарында ауа сапасын өлшеу жұмыстары жүргізілді. Соның нәтижесінде кейбір зиянды заттардың рұқсат етілген шектен асып кеткені анықталды. Осыған байланысты экология департаменті ауаны ластаушы кәсіпорындарға қатысты жоспардан тыс тексеру жүргізуді бастайды, — деп хабарлады департаменттің баспасөз қызметінен.
Ауа жағдайына жедел мониторинг жасап отыру үшін осындай тексерулер тұрақты түрде жүргізілмек.