Қалада «Өскемен тынысы» экологиялық бюросын құру жұмыстары жүргізіліп жатыр. Соған орай жұмыс тобының кезекті отырысы өтті. Бюроға мүше болатын адамдар мен ұйым құрылымы анықталды. Атқарылған шаралардың нәтижесін нақты көріп отыру үшін жобалық кеңсе форматында жұмыс істеу туралы шешім қабылданды.
— Бюроның негізгі мақсаты – қаланың экология мәселесін шешу үшін қолға алынатын жұмыстарды үйлестіру. Қазірдің өзінде 2025 жылға арналған жоспар дайындалды. Оның ішінде 100-ге жуық шара бар. Қолайсыз метеорологиялық жағдай кездерінде әрекет ету алгоритмдері әзірленуде. Сондай-ақ тұрғындарды ауаның ластану көрсеткіштері туралы хабардар ету жүйесі іске қосылмақ, — дейді жоба жетекшісі Елена Березинская-Абилова.
Жобалық кеңсе мемлекеттік органдармен өзара әрекеттесіп, экологиялық жағдайды жақсарту бойынша нақты шараларды ұсынуда. Олардың бірқатар бастамасы келесідей:
— заманауи датчиктерді пайдалана отырып, көліктердің зиянды шығарындыларын бақылау;
— экология департаментіне қажетті жабдықтардың толық тізімін жасайтын компаниямен ынтымақтастық орнату;
— көгалдандыру алаңын ұлғайту;
— Smog Free Tower жабдығын орнату. Бұл 8 метрлік мұнара. Осындай 1 мұнара бір сәтте 30 мың текше метр ауаны сүзе алады. Жүйе өзі өндіретін 1,4 кВт энергияны ғана тұтынады.
Бұдан бөлек, жеке секторды орталықтандырылған жылу жүйесіне қосу басты назарға алынған. Бюроның жоспары Шығыс Қазақстан облысының әкіміне 10 қаңтарда таныстырылады.