Шығыс Қазақстан облысында қысқы мезгіліне автокөлік жолдарын дайындау жұмыстары аяқталды. Бұл туралы ШҚО Өңірлік коммуникациялар қызметі алаңында ШҚО Жолаушы көлігі және автомобиль жолдары басқармасы басшысының орынбасары Нұрбек Тұраров мәлім етті.
— Қыста қауіпсіз және үздіксіз қозғалысты қамтамасыз ету мақсатында 783 қар тазалау техникасы дайындалды. Оның ішінде автогрейдерлер, әмбебап жол машиналары және қар тазалағыш щеткалы тракторлар бар. Техниканың шамамен 90%-ы жұмысқа жарамды күйде және пайдалануға дайын, — деді Нұрбек Тұраров.
Облыс бойынша жалпы автомобиль жолдарының ұзындығы 5262 шақырымды құрайды. Оның ішінде 1238 км республикалық маңызы бар жолдар, 1583 км облыстық маңызы бар жолдар, 2441 км аудандық деңгейдегі жолдар.
Республикалық жолдарды күтіп-ұстау жұмыстарымен «ҚАЗСервис» ЖШС айналысса, облыстық жолдарды «ОблШығысЖол» ЖШС қызметкерлері қадағалайды. Аудандық жолдарды күтіп-ұстау жергілікті мекемелердің қолында.
Қыстағы төтенше жағдайларды жою үшін ШҚО ТЖД-ның 1717 адамы және 686 техникасы жұмылдырылмақ. Құтқару және медициналық пункттер де әзір.