Жыл басынан бері Өскемен қаласында мопед пен скутер жүргізушілерінің қатысуымен болатын жол-көлік оқиғаларының саны күрт көбейіп кетті. Бұл шаһар жолдарында жыл сайын екі дөңгелекті көліктер санының артуына және мопед жүргізушілерінің автокөлік жүргізушілеріне қарағанда жол қозғалысы ережелерін дұрыс сақтамайтындығына қатысты болып отыр.
Көбінесе мұндай оқиғалар екі дөңгелекті көлік жүргізушілердің жарақат алуына әкеліп соғып жатады. Полицейлер жол апаттарының көбеюіне кәмелетке толмағандардың мопед тізгіндей бастауы да тікелей әсер етіп отырғанын айтты.
«Жыл басынан бері мопедтер мен скутерлердің қатысуымен 70-ке жуық жол-көлік оқиғасы тіркелді. Бұл өткен жылғы көрсеткішпен салыстырғанда бірнеше есе көп. Жол апаттары салдарынан 79 адам зардап шексе, оның 39-ы кәмелетке толмағандар. Сондай-ақ тәртіп сақшылары 150-ге жуық жол ережесін бұзған мопед және скутер жүргізушілерін анықтады», — дейді қалалық ПБ жол-көлік оқиғасы бөлімінің бастығы Сергей Коваленко.