2025 жылдан бастап өңірдегі көпбалалы аналар облысішілік автобустармен тегін жүретін болады. Бұл туралы ШҚО Өңірлік коммуникациялар қызметінде өткен баспасөз конференциясында айтылды.
— Қазір өңір бойынша аз қамтылған отбасылардан шыққан балалар облысішілік автобустарға тегін отырады. Бұл мақсатта 178 млн теңгеден астам қаржы бөлініп, 5312 бала қамтылған. Енді келер жылдан бастап «Алтын алқа», «Күміс алқа», «Батыр ана», I және II дәрежелі «Ана даңқы» ордендерімен марапатталған көпбалалы аналар үшін қалааралық және ауданаралық қоғамдық көліктер тегін болады», — деді Шығыс Қазақстан облыстық Жолаушы көлігі және автомобиль жолдары басқармасы басшысы орынбасарының міндетін атқарушы Қуаныш Акрамов.
Оның айтуынша, бұған қажетті қаражат жергілікті бюджеттен бөлінеді.