Құтқарушылардың кәсіби мерекесі қарсаңында Шемонаиха ауданы Усть-Таловка кентінде жаңа аллея ашылды. Онда азаматтық қорғау органы қызметкерлеріне арналған монумент те қойылған.
Ашылу салтанатына ШҚО ТЖД бастығы Рашид Блялов пен аудан әкімі Григорий Акулов қатысты.
Монумент идеясы № 28 өрт сөндіру бөлімінің бастығы Дидар Әшімханға тиесілі. Ол М. Ғабдуллин атындағы Азаматтық қорғау академиясының түлегі. 5 жылдан астам тілсіз жаумен күресіп, аудан азаматтарының қауіпсіздігін қамтамасыз етуде.
«Монумент – бұл адамдардың өмірін құтқару үшін күн сайын өліммен бетбе-бет келуден қорықпаған бейбіт күннің батырларына арналған алғыс символы. Биыл облыс құтқарушылары 2831 рет түрлі оқыс оқиғаға барды. Барлығы 1075 адам эвакуацияланып, 235 адам құтқарылды. Бұл тұрғызылған монумент өскелең ұрпақты тәрбиелеп, құтқарушыларға рух береді», — дейді ШҚО ТЖД бастығы Рашид Блялов.