Шығыс Қазақстан облысында қараша айында ауа райы салыстырмалы түрде жылы болады деп болжанып отыр «Қазгидромет» РМК ШҚО филиалының мәліметінше, өңірде қараша айындағы ауаның орташа температурасы климаттық нормадан 2 градусқа жоғары болады деп күтілуде.
Айдың басы жылы болады. Күндіз ауа температурасы +5…+10°C-қа дейін көтерілсе, түнде 0…+5°C аралығында құбылады. Алайда облыстың таулы аудандарында ауа райы айтарлықтай суық болмақ. Онкүндіктің ортасына қарай түнде -5…-10°C-қа дейін аяз түседі. Күндіз ауа температурасы +3°C-тан аспайды, — делінген ақпаратта. Онкүндіктің соңында күн қайта жылынады. Дегенмен, бұл жылымық ұзаққа созылмайды.
Қарашаның екінші онкүндігінің басында түнде де, күндіз де ауа температурасы нөлден төмендейді деп болжанып отыр. Күндіз -2…-7°C, түнде -10…-15°C аяз болады. Ал өңірдің таулы аудандарында ауа температурасы -20°C-қа дейін төмендеуі мүмкін. Онкүндіктің соңына қарай күн сәл жылынады.
Қарашаның үшінші онкүндігінің басында қайтадан ауа райы суытады. Күндіз ауа температурасы 0…-5°C аралығында болса, түнде -8…-13°C-қа дейін төмендейді. Таулы аудандарда аяз -18°C-қа дейін жетуі мүмкін. Айдың соңына қарай күн біршама жылынады, — делінген хабарламада. Айлық жауын-шашын мөлшері климаттық нормадан жоғары болады деп күтілуде. Қараша бойы жаңбыр мен қар жауады. Кей күндері боран соғуы ықтимал.