Бұл туралы бүгін Шығыс Қазақстан облысының әкімі Нұрымбет Сақтағанов Қалжыр ауылында аудан тұрғындарымен кездесу барысында мәлімдеді.
– Марқакөл ауданын дамытудың 2026–2030 жылдарға арналған жоспары бекітілді. Ауданның одан әрі дамуына ауыл шаруашылығы, өнеркәсіп, жоғары туристік әлеует, шағын және орта бизнес берік негіз қалайды. Қазір өнеркәсіп өндірісін дамытуға бағытталған инвестициялық жобалар іске асырылып жатыр. Атап айтқанда, 1 млрд теңгеге мыс өндіру және өңдеу зауытын кеңейту жұмыстары жүргізілуде. Жоба өндірістік қуаттарды арттырып, металлургияға арналған өнім көлемін ұлғайтуға мүмкіндік береді. 2028–2030 жылдары аудан аумағында 2 жобаны іске асыру жоспарланған: алтын өндіру фабрикасын және Қалжыр өзенінде шағын су электр станцияларының каскадын салу, – деді облыс әкімі.
Марқакөл ауданында 330-дан астам шаруа қожалығы жұмыс істейді. Мал шаруашылығы да дамып келеді: 8 айда 3,1 мың тонна ет және 8,3 мың тонна сүт өндірілді. Нұрымбет Сақтағанов пайдаланылмай жатқан ауыл шаруашылығы жерлерін айналымға тарту жұмысын жандандырып, жемшөп базасын нығайту қажет екенін атап өтті.
– Марқакөл мемлекеттік табиғи қорығының аумағында 11 туристік маршрут бар. Ақжайлау ауылында «Уасси» этноауылы дамып келеді. Онда келушілерді ұлттық мәдениетпен және салт-дәстүрлермен таныстырып, табиғат аясында демалыс пен атпен серуендеуді ұйымдастырады. Туризмді дамыту үшін Ұранхай ауылының рекреациялық аймағында абаттандыру және инженерлік инфрақұрылым құру жобасы іске асырылды, – деді ШҚО әкімі.