Қазақстан-Американдық еркін университетінің студенттері Шығыс Қазақстан облысы Полиция департаментінің қызметкерлерімен сотқа дейінгі тергеп-тексеру барысы мен жәбірленушілердің құқықтарын қорғау мәселелерін талқылады. Кездесу дуалды оқыту аясында өтті.
«Құқықтану» факультетінің 4-курс студенттеріне сабақты ШҚО ПД Анықтау басқармасының бастығы, полиция полковнигі Арман Умутов өткізді. Болашақ заңгерлер заңнамадағы соңғы өзгерістермен танысты. Соның ішінде тұрмыстық зорлық-зомбылыққа қарсы іс-қимыл және жәбірленушілердің құқықтарын қорғау саласындағы өзгерістерге назар аударылды.
Кездесуде мамандықтың тәжірибелік қырлары да сөз болды. Студенттерге қылмыстық қудалау органдарының немен айналысатыны, тергеу бөлімшелерінің заңдылықты қамтамасыз ету мен азаматтардың құқықтарын қорғаудағы рөлі түсіндірілді. Сотқа дейінгі тергеп-тексерудің қалай жүргізілетіні бөлек талқыланды.
Оқуды бітіргеннен кейінгі жұмыс жайы да әңгімеге арқау болды. Студенттерге ішкі істер органдарына қызметке орналасу, кәсіби даму және тергеу бөлімшелерінде мансаптық өсу мүмкіндіктері туралы айтылды.