Жыл басынан бері Шығыс Қазақстан облысында 620-дан астам адамның Қазақстан азаматтығынан айырылғаны тіркелді. Тағы 38 адам азаматтық туралы заң талаптарын бұзғаны үшін әкімшілік жауапқа тартылды, деп хабарлады ШҚО полиция департаменті.
Қазақстанда қос азаматтыққа жол берілмейді. Көші-қон қызметі басқа елдің азаматтығын алғанын хабарламай, Қазақстан құжаттарын пайдалануды жалғастырған адамдарды анықтап жатыр.
– Анықталған деректердің басым бөлігі көрші мемлекеттердің азаматтығын алған адамдарға қатысты, – деді ШҚО ПД Көші-қон қызметі басқармасының бастығы Ринат Шкибаев.
Осындай жағдайлардың бірі Алтай ауданында анықталды. 21 жастағы жергілікті тұрғын басқа мемлекеттің азаматтығын алған, бірақ бұл туралы құзырлы органдарға уақытында хабарламаған. Тексеру кезінде оның құжаттары алынып, Қазақстан азаматтығынан айырылғаны тіркелді.
ШҚО полиция департаменті басқа елдің азаматтығын алған жағдайда көші-қон қызметіне уақытында хабарлау қажет екенін еске салды.