Шығыс Қазақстан облысында Осинов асуы арқылы жүріп өткен шынжыр табанды экскаватор жол жамылғысын бүлдірген.
Оқиға 7 қыркүйек күні Өскемен-Алтай-Үлкен Нарын-Рахман қайнарлары тасжолының 55-60 шақырымында болған. Арнайы техника асфальт жабынын зақымдаған.
— Жүргізушіге қатысты Қазақстан Республикасының Әкімшілік құқық бұзушылық туралы Кодексінің 630-бабы 1-бөлігі бойынша әкімшілік хаттама толтырылды, — деп хабарлады ШҚО полиция департаментінен.
Жолдың бүлінген бөлігін қалпына келтіру мәселесін жол кімнің балансында сол шешеді. Полиция тиісті материалдарды жолдайды.
Айта кетейік, қазір Осинов асуын айналып өтетін, Бұқтырма су қоймасының жағалауына апаратын жол салынып жатыр. Жаңа жолды 2026 жылдың соңына дейін аяқтау жоспарланған.