Өскемен қаласында «Туған жер – алтын бесігім» облыстық жобасы аясында Алтай ауданының мәдени күндері өтеді.
Іс-шаралар бағдарламасы 17 қыркүйек күні сағат 10:00-де Сәрсен Аманжолов атындағы Шығыс Қазақстан университетінің студенттерімен аудан өкілдерінің кездесуінен басталады.
Ары қарай 18 қыркүйекте Арбатта жалғасады. Сағат 10:00-ден бастап қала тұрғындары мен қонақтары көрмелер мен таныстырылымдар арқылы ауданның тыныс-тіршілігімен таныса алады. Көрмелерде балалар шығармашылығы, табиғат, туризм, экологиялық бастамалар, Алтайдың мәдениеті мен дәстүрлері таныстырылады. Сондай-ақ ауданның дамуына бағытталған заманауи технологиялар мен жасанды интеллект мүмкіндіктеріне арналған арнайы бөлім қарастырылған.
Сағат 17:00-де Шығыс Қазақстан облыстық филармониясында «Алтай: цифрлық болашақ аумағы» көрмесінің ашылуы өтеді. Келушілерге ауданның жетістіктері, жүзеге асырылып жатқан жобалар және өңірде енгізіліп жатқан заманауи шешімдер таныстырылады.
Сағат 18:00-де филармонияның концерт залында Алтай ауданының шығармашылық ұжымдарының қатысуымен концерттік бағдарлама басталады. Алтай ауданының мәдени күндері 19 қыркүйекте ауыл шаруашылығы жәрмеңкесімен қорытындыланбақ. Жәрмеңке сағат 8:00-де «Алтай» көтерме-бөлшек сауда орталығының аумағында басталады. Келушілер аудан шаруагерлерінен тікелей сапалы жергілікті өнімдерді сатып ала алады.