Қазақстанда мерзімді әскери қызметтің белгіленген мерзімін өтеген 1 745 азамат жоғары оқу орындарында білім алу үшін мемлекеттік білім беру гранттарына ие болды. Ең танымал бағыт ақпараттық технологиялар атанды.
IT саласын 234 адам таңдаған. Бұл грант иегерлерінің жалпы санының 13,4%-ын құрайды. Екінші орында орман шаруашылығы тұр. Бұл бағытқа 136 адам немесе 7,8% түспек. Үшінші орынға коммуникациялар және коммуникациялық технологиялар жайғасты. Оны 134 адам немесе 7,7% таңдаған. Тағы 119 адам немесе 6,8% ақпараттық қауіпсіздікті оқуға шешім қабылдады.
Жоғары оқу орындарының арасында мұндай грант иегерлерінің ең көбі Қазақ ұлттық аграрлық зерттеу университетіне түседі – 156 адам немесе 8,9%. Л.Н. Гумилев атындағы Еуразия ұлттық университетін 144 адам немесе 8,3% таңдаған. Әл-Фараби атындағы Қазақ ұлттық университеті мен М. Әуезов атындағы Оңтүстік Қазақстан университеті үшінші орынды бөлісті. Әр оқу орнына 134 адамнан немесе 7,7%-дан түседі.
Мемлекеттік білім беру грантына ие болғандардың бірі – Әлихан Жамбылов. Ол әскери қызметтен кейін ақпараттық қауіпсіздік бағытын таңдаған.
– Мен ақпараттық қауіпсіздік мамандығын саналы түрде таңдадым. Қазір цифрлық технологиялар іс жүзінде барлық салада қолданылады, сондықтан ақпаратты қорғау мамандарына сұраныс жоғары. Мерзімді әскери қызметтен кейін грант алу мүмкіндігі мен үшін үлкен ынталандыру болды. Ендігі міндетім – сапалы білім алып, білікті маман атану, – деді Әлихан Жамбылов.
Әскери қызметшілер «Срочники 2.0» цифрлық жобасы аясында іріктеледі. Мерзімді әскери қызмет кезінде жүйе әр әскери қызметшінің цифрлық рейтингін қалыптастырады. Онда жауынгерлік даярлық нәтижелері, әскери тәртіп және басқа да көрсеткіштер ескеріледі.
Осыдан кейін ақпараттық жүйе білім беру гранттарын автоматты түрде бөледі. Мұндай тетік іріктеудің ашықтығын қамтамасыз етіп, адами фактордың ықпалын болдырмауға тиіс.
Мерзімді әскери қызметшілердің мемлекеттік білім беру грантын, шәкіртақы және жатақханадан орын алуға басым құқық алу мүмкіндігі 2024 жылы заңмен бекітілді.
Сонымен қатар мерзімді әскери қызметтің белгіленген мерзімін өтеген азаматтар қызмет барысында өткізілетін іріктеу нәтижесі бойынша жоғары әскери оқу орындарына түсе алады.
Білім беру жеңілдіктері мерзімді әскери қызметтің беделін арттыру шараларының біріне айналды. Сонымен бірге запасқа шығарылған жастар нақты мүмкіндікке ие болады – білім алып, мамандық игереді.