Риддер қаласында 600 оқушыға арналған жаңа білім ордасының құрылысы жалғасып жатыр. Шығыс Қазақстан облысы әкімдігінің мәліметінше, бүгінде нысанның құрылыс жұмыстары 80%-ға орындалған.
Жобаның жалпы құны 5 миллиард теңгеден асады. Құрылыс 2025 жылдың қаңтар айында басталған, ал оны 2026 жылдың тамызында аяқтау жоспарланып отыр.
Қазіргі таңда нысанда ішкі әрлеу жұмыстары жүргізіліп, желдету жүйелері орнатылуда және ғимараттың қасбеті қапталуда. Сонымен қатар келесі кезеңге дайындық жұмыстары жүргізіліп жатыр. Одан кейін оқу және технологиялық жабдықтарды орнату басталады.
Сол жерде күн сайын 60-қа жуық маман еңбек етіп, үш арнайы техника жұмылдырылған. Бас мердігер болашақ мектепті қажетті оқу құралдары мен жабдықтармен қамтамасыз етуді де қолға алған.
Мектепте кең оқу кабинеттері, мамандандырылған сыныптар, спорт және акт залдары, кітапхана мен асхана болады. Сондай-ақ ерекше білім беруді қажет ететін балаларға қолайлы жағдай жасалып, энергия тиімділігі мен қауіпсіздік талаптарына сай шешімдер енгізілмек.
Пайдалануға берілгеннен кейін жаңа мектеп қаладағы қолданыстағы білім беру ұйымдарының жүктемесін азайтып, оқушылардың сапалы әрі жайлы жағдайда білім алуына мүмкіндік береді. Құрылыс барысы тұрақты бақылауда, барлық жұмысты жаңа оқу жылы басталғанға дейін аяқтау жоспарланған.