Шығыс Қазақстан облысында экологиялық мәдениетті қалыптастыруға, елді мекендердің тазалығын сақтауға және қоғамдық орындарды абаттандыруға бағытталған «Таза Қазақстан» республикалық экологиялық акциясы жалғасуда. Бұл бағыттағы жұмыста полиция маңызды рөл атқарып, абаттандыру ережелері мен қоғамдық тәртіптің сақталуын қатаң бақылауға алуда.
Өңір көшелерінде күн сайын полиция қызметкерлері қызмет атқарады, сондай-ақ Жедел басқару орталығының мүмкіндіктері толық көлемде пайдаланылуда. Бейнебақылау камералары мен заманауи мониторинг жүйелері қоғамдық орындарды ластау, абаттандыру ережелерін бұзу фактілерін тәулік бойы анықтауға және тәртіп бұзушыларды жедел табуға мүмкіндік береді.
Ағымдағы жылдың басынан бері «Таза Қазақстан» акциясы аясында полицейлер 6 мыңға жуық әкімшілік құқық бұзушылықты анықтады. Оның ішінде 4,8 мыңға жуығы аумақтарды абаттандыру ережелерін бұзуға қатысты болса, тағы бір мыңнан астамы жалпы пайдалану орындарын ластауға байланысты. Сонымен қатар, облыс аумағында 120-дан астам рұқсат етілмеген қоқыс үйінділері анықталып, әрбір факті бойынша тиісті шаралар қабылданды.
Цифрлық технологияларды қолдану құқық бұзушылықтарға жедел ден қоюға ғана емес, сонымен қатар тиімді профилактикалық жұмыстарды жүргізуге септігін тигізеді. Қоғамдық орындардың бейнебақылау камераларының назарында екенін түсіну азаматтардың жауапкершілігін арттырып, қоршаған ортаға ұқыпты қарауға ықпал етеді.
Дегенмен, «Таза Қазақстан» акциясынын басты мақсаты – толтырылған әкімшілік материалдардың саны емес, тазалық пен саналы жауапкершілік мәдениетін қалыптастыру. Өйткені таза аула, көше немесе саябақ әрбір адамның қарапайым әрекетінен – қоқыс қалдырмаудан, өзгелердің еңбегін құрметтеуден және абаттандыру ережелерін сақтаудан басталады.
Шығыс Қазақстан облысы Полиция департаменті өңір тұрғындары мен қонақтарын «Таза Қазақстан» акциясын қолдауға шақырады. Тек бірлескен күш-жігермен ғана қалаларымыз бен ауылдарымызды таза, жайлы әрі өмір сүруге қолайлы етуге болады. Өйткені тазалық – әрқайсымыздың ортақ жауапкершілігіміз.