Шығыс Қазақстан облысында сауалнамаға қатысқан NEET санатындағы жастардың басым бөлігінің кәсіптік білімі бар. Олардың арасында колледж дипломы бар жастар ең үлкен топты құрайды. Әлеуметтік портреті жасалған 937 жастың 552-сі арнаулы орта білім алған. Тағы 124 адам жоғары оқу орнын тәмамдаған.
200 адамның жалпы орта білімі, яғни 11 сыныптық білімі бар. 59 адам негізгі орта білімді, яғни тоғыз сыныпты аяқтаған. Екі адамның білімі жоқ. Ал сауалнамаға қатысқандар арасында жоғары оқу орнынан кейінгі білімі бар жастар анықталмаған.
Бұл деректер NEET мәртебесін тек дипломның жоқтығымен түсіндіруге болмайтынын көрсетеді. Тізімде колледж түлектері де, жоғары білімі бар азаматтар да бар. Сонымен қатар сауалнамаға қатысқан 175 адам ресми түрде жұмыс істейді, 664 адам бейресми еңбек етеді, ал 68 адам жұмысқа орналасуға мұқтаж.
ШҚО жұмыспен қамтуды үйлестіру және әлеуметтік бағдарламалар басқармасы әлеуметтік портреттерді жастармен атаулы жұмыс жүргізу және оларға лайықты қолдау шараларын таңдау үшін пайдалануды жоспарлап отыр.