Өскеменде Шығыс Қазақстан облысының ардагерлер қауымдастығының үш өкілі «Ардагерлер ұйымы» республикалық қоғамдық бірлестігі орталық кеңесінің «Құрмет белгісі» төсбелгісімен марапатталды.
Марапаттау рәсімі «Ұрпақтар сабақтастығы және ұлттық құндылықтар» атты дөңгелек үстелдің қорытындысы бойынша өтті. Кездесуге ұйымның орталық кеңесінің төрағасы Әбілғазы Құсайынов, ШҚО әкімі Нұрымбет Сақтағанов, ардагерлер бірлестіктері мен мемлекеттік органдардың өкілдері қатысты.
«Құрмет белгісі» төсбелгісімен:
Катонқарағай аудандық ардагерлер кеңесінің төрағасы Жәнібек Қызыров;
Глубокое аудандық ардагерлер кеңесіне қарасты Краснояр ауылдық округінің бастауыш ардагерлер ұйымының төрағасы Нина Ершова;
Ұлан аудандық ардагерлер кеңесіне қарасты Аблакет ауылдық округінің бастауыш ардагерлер ұйымының төрағасы Әлімхан Оразаев марапатталды.
Нұрымбет Сақтағанов аға буынның өңірдің қоғамдық өміріне қосып жүрген үлесін атап өтті.
– Ардагерлер – елдің берекесі мен бірлігінің, сабақтастық пен даналықтың алтын көпірі. Сіздердің өмірлік ұстанымдарыңыз, қажырлы еңбектеріңіз бен өнегелі жолдарыңыз өскелең ұрпақ үшін әрдайым үлгі, – деді облыс әкімі.
Бүгінде Шығыс Қазақстан облыстық ардагерлер ұйымы 130 мыңнан астам адамды біріктіреді. Қалалар мен аудандарда 500-ге жуық бастауыш ардагерлер ұйымы жұмыс істейді. Олар жастарды патриоттық рухта тәрбиелеуге, қайырымдылық және әлеуметтік жобаларды жүзеге асыруға атсалысады.
Сонымен қатар өңірде 175 белсенді ұзақ өмір сүру орталығы жұмыс істейді. Онда зейнеткерлер дене шынықтырумен айналысып, спорттық, би және шығармашылық үйірмелерге қатысады, жаңа білім алып, белсенді өмір салтын ұстанады.
