Қазақстанда жолаушылар пойыздарын спутниктік интернетпен жабдықтау жалғасып жатыр. Көлік министрлігі тасымалдаушыларға жұмысты жеделдетіп, пойыздарды осы жылдың соңына дейін интернетке қосуды аяқтауды тапсырды.
Бұл мәселе әлеуметтік маңызы бар теміржол бағыттарына қызмет көрсететін тасымалдаушылар қатысқан кеңесте талқыланды. Қатысушылар саланың бірінші жартыжылдықтағы жұмысын қорытындылап, жолаушылар тасымалын одан әрі дамыту мәселелерін қарастырды.
Қазір Қызылорда – Павлодар, Жезқазған – Астана, Астана – Семей, Алматы – Достық және Қызылорда – Көкшетау бағыттарындағы пойыздарда интернет жұмыс істейді.
Интернетке қосылу үшін спутниктік байланыс қолданылады. Соның арқасында ұялы байланыс операторларының желісі жоқ учаскелерде де интернетке қолжетімділік сақталады.
Жолаушылар бағыттың бүкіл бойында дерлік мессенджерлерді, әлеуметтік желілерді, жұмыс сервистерін және басқа да онлайн платформаларды пайдалана алады.
Интернетке қосылу үшін пойыздағы Wi-Fi желісін таңдап, авторизациядан өту қажет. Осыдан кейін жолаушы WhatsApp пен Telegram арқылы мәтіндік хабарлама алмасуға тегін қол жеткізеді.
Ал интернет ресурстарын, әлеуметтік желілерді, бейнесервистер мен жұмыс қосымшаларын толық пайдалану үшін ақылы тариф рәсімдеу керек. Тегін қызмет тек хат алмасуға арналған. Сериал мен бейнеролик көру немесе станциялар арасында бейнекеңес өткізуге әрекет жасау үшін ақы төлеуге тура келеді.
Кеңес қорытындысы бойынша Көлік министрлігі тасымалдаушыларға жолаушылар пойыздарын интернетпен жабдықтау қарқынын арттырып, бұл жұмысты осы жылдың соңына дейін аяқтауды тапсырды.