Шығыс Қазақстан облысындағы NEET санатындағы жастардың әлеуметтік портреттері тосын жайтты көрсетті: тізімдегі жастардың көбі іс жүзінде жұмыс істейді. Бір бөлігі ресми түрде еңбек етсе, енді бірі еңбек шартынсыз жұмыс істеп жүр.
Барлығы 937 әлеуметтік портрет толтырылған. Талдау қорытындысы бойынша 175 адам ресми жұмысқа орналасқан, ал 664 адам бейресми еңбек етеді.
Тағы 68 адам жұмысқа орналасуға мұқтаж. 11 жас өз кәсібін ашу немесе дамыту үшін мемлекеттік қолдау алуға ниет білдірген. 19 адамның денсаулығына байланысты жұмысқа орналасуын қиындататын шектеулері бар.
Басқарма жастардың ресми жұмыспен қамтуға қатысты көзқарасын да зерттеді. 68 адам ресми түрде жұмысқа орналасуға ниет білдірген. Сауалнама кезінде 664 адам мұндай ниет танытпаған, ал 40 адам әлі нақты шешім қабылдамаған.
Жағдайдың шынайы көрінісі осындай: статистика адамды NEET санатына жатқызады, ал ол сол уақытта ресми келісімшартсыз болса да жұмыс істеп жүреді. Әлеуметтік портреттер нақты проблеманы есептегі жай жазбадан ажыратуға мүмкіндік береді.
ШҚО Жұмыспен қамтуды үйлестіру және әлеуметтік бағдарламалар басқармасының мәліметінше, жиналған ақпарат жастардың қажеттіліктерін нақты анықтап, оларға атаулы қолдау шараларын ұсынуға көмектеседі.