2026 жылдың басынан бері Шығыс Қазақстан облысында сауда саласындағы заң талаптарын бұзу деректері бойынша 81 әкімшілік іс қозғалды. Айыппұлдардың жалпы сомасы бір миллион теңгеден асты.
ШҚО кәсіпкерлік және өнеркәсіп басқармасының мәліметінше, әкімшілік жауапкершілікке:
49 кәсіпкер – әлеуметтік маңызы бар азық-түлік тауарларына белгіленген 15% сауда үстемесін асырғаны үшін, ҚР ӘҚБтК-нің 204-4-бабы 1-бөлігі бойынша;
25 кәсіпкер – тауарды баға белгісінсіз сатқаны үшін, ҚР ӘҚБтК-нің 193-бабы 4-бөлігі бойынша тартылды.
Бақылау сауда нысандарындағы баға мониторингі және делдалдық схемаларды тергеп-тексеру жөніндегі комиссиялар арқылы жүргізіледі. Сауда үстемесін асыру деректері комиссия отырыстарында қаралып, кейін шара қолдану үшін материалдар Сауда департаментіне жолданады.
Әлеуметтік маңызы бар азық-түлік тауарларына қойылатын ең жоғары сауда үстемесі 15%-ды құрайды. Бұл кәсіпкерлерге берілген кеңес емес, заңмен белгіленген шектеу. Бағаны тұрақтандыру жұмысына қалалар мен аудандардың әкімдіктері, Сауда департаменті және «Ертіс» қатысады. Билік баға орташа облыстық деңгейден едәуір жоғары аудандарға ерекше назар аудармақ.