Шығыс Қазақстан облысында 1 503 адам алты айдан астам уақыт бойы жұмыссыз ретінде есепте тұр. Олар басым санаттағы жұмыссыздар қатарына жатқызылғанымен, жұмыспен қамтуға жәрдемдесу шараларымен небәрі 59 адам қамтылған.
Олардың 33-і тұрақты жұмысқа орналасты, 23 адам субсидияланатын жұмыс орындарына жіберілді. Тағы үш адам кәсіптік оқуға жолдама алды.
Бұдан бөлек, 542 адам мемлекеттік қолдау шаралары көрсетілместен есептен шығарылған. Тағы 902 адам жұмыспен қамтуға жәрдемдесу шараларымен мүлде қамтылмаған.
Алайда Электрондық еңбек биржасына тіркелгендердің бәрі бірдей жұмыс іздеп жүрген жоқ. Қолдау шараларымен қамтылмаған 902 адамның 483-і жұмысынан айырылуына байланысты әлеуметтік төлем алу үшін тіркелген. Тағы 42 адам медициналық қызмет алу, бір адам білім беру саласындағы жеңілдіктерді пайдалану, төрт адам несие мерзімін ұзарту үшін есепке тұрған.
Тікелей жұмысқа орналасуды қажет ететіндер саны – 372 адам. Олардың арасында 15 пен 35 жас аралығындағы 81 жас бар.