Қазақстан Денсаулық сақтау министрлігінің бірінші вице-министрі Тимур Сұлтанғазиев бастаған делегация Татарстан Республикасына барды. Қазақстандық мамандар өңірдің медициналық білім беру, ғылым және денсаулық сақтау салаларындағы тәжірибесімен танысты.
Жұмыс сапарының басты мақсаты – Қазақстан мен Татарстан арасындағы ынтымақтастықты нығайту. Тараптар медицина мамандарын даярлау, заманауи білім беру, клиникалық және цифрлық технологияларды енгізу, сондай-ақ бірлескен ғылыми жобаларды дамыту мәселелерін талқылады.
Сапар барысында қазақстандық делегация Татарстанның жетекші медициналық және білім беру ұйымдарының жұмысымен танысты.
Маңызды кездесулердің бірі Қазан мемлекеттік медицина университетінің ректоры Айрат Фарраховпен өтті. Тараптар бірлескен білім беру бағдарламаларын іске қосу, дәрігерлер даярлау саласындағы ынтымақтастықты кеңейту және оқу үдерісіне заманауи технологияларды енгізу мүмкіндіктерін қарастырды.
Сапар бағдарламасына Қазан мемлекеттік медицина университетінің Кадаверлік орталығы, «AMTEK» білім беру орталығы, Республикалық клиникалық аурухана, Балалар республикалық клиникалық ауруханасы, № 7 мемлекеттік клиникалық аурухана және Өңіраралық клиникалық-диагностикалық орталық кірді.
Делегация медициналық симуляциялық технологияларды әзірлейтін жетекші компаниялардың бірі – «EIDOS» компаниясының өндірістік алаңына да барды. Мұндай жүйелер болашақ дәрігерлерге нақты пациенттермен жұмыс істегенге дейін тәжірибелік дағдыларын жетілдіруге мүмкіндік береді.
Сапарға қатысушылар медицина мамандарын тәжірибеге бағыттап даярлау, симуляциялық оқытуды дамыту, денсаулық сақтау саласын цифрландыру және жоғары технологиялық медициналық көмекті ұйымдастыру мәселелеріне ерекше назар аударды. Сондай-ақ тараптар клиникалық тәжірибеде инновациялық шешімдерді қолдану жолдарын талқылады.
Бұдан бөлек, Тимур Сұлтанғазиев пен қазақстандық делегация өкілдері Татарстан Республикасы Мемлекеттік кеңесінің төрағасымен және Татарстанның денсаулық сақтау министрімен кездесті.
Келіссөздер барысында қатысушылар халықаралық ынтымақтастықты кеңейту, денсаулық сақтау жүйесін ұйымдастыру тәжірибесімен алмасу, медицина ғылымын дамыту, саланы цифрлық трансформациялау және жоғары білікті мамандар даярлау мәселелерін талқылады.
Сапар қорытындысында тараптар серіктестік қатынастарды одан әрі дамытуға және Қазақстан мен Татарстан Республикасының медициналық ұйымдары арасындағы академиялық алмасуды кеңейтуге мүдделі екенін растады.