Жаңа Бұқтырмада соңғы жылдардағы ең ауқымды өзгерістер жүріп жатыр деуге болады. Көркем жағалауы, сұлу табиғаты, ысталған балық пен саяжай өнімдері сатылатын жергілікті базары арқылы көпшілікке бұрыннан таныс кент біртіндеп жаңа келбетке еніп келеді. Енді ол туристер үшін ғана емес, жергілікті тұрғындар үшін де тартымды заманауи курортқа айналуда.
Бұл өзгерістердің негізі – инженерлік инфрақұрылымды ауқымды жаңғырту. Кентте инженерлік желілер жаңартылып, жолдар жөнделіп, одан әрі дамуға қажетті сенімді база қалыптастырылып жатыр. Жағалау қанша жерден көркем болса да, мұндай жұмыстарсыз заманауи курорт құру мүмкін емес.
Қоғамдық кеңістіктер де жаңарып келеді. Орталық жағажай заманауи демалыс орнына айналды. Оның жанынан жаңа Арбат ашылды. Жайлы серуен аймағы қазірдің өзінде кенттегі басты демалыс орындарының біріне айналып үлгерді. Ал шолу дөңгелегі Жаңа Бұқтырманың жаңа нышаны болды. Оның биігінен Бұқтырма су қоймасы мен Алтай тауларының көркем көрінісі ашылады. Мұндай панорамамен кез келген курорт мақтана алмайды, ал мұнда ол серуенге қоса берілгендей.
Белсенді демалысты ұнататындар үшін де мүмкіндік бар. Кентте спорт алаңдары, памп-трек және воркаут аймағы салынды. Мәдениет үйінің аумағы жаңартылып, жарық шашатын субұрқақ орнатылды. Ескерткіш орналасқан саябақ та абаттандырылды. Мұның бәрі отбасымен демалып, серуендеп, уақыт өткізуге қолайлы заманауи орта қалыптастырады.
Өзгерістерді жергілікті тұрғындар да сезініп отыр. Туристік инфрақұрылымның дамуымен бірге кентте өмір сүру де жайлы бола түсті. Шағын бизнес пен қызмет көрсету саласына жаңа мүмкіндіктер ашылып жатыр.
Нәтижесінде Жаңа Бұқтырма заманауи абаттандыру мен Алтайдың бірегей табиғаты үйлесім тапқан демалыс орнына біртіндеп айналып келеді. Курорт өзінің басты құндылығы – көркем табиғатын сақтап, бұрынғыдан әлдеқайда жайлы бола түсті. Егер бұрын жұрт мұнда жағажай мен әйгілі ысталған балық үшін келсе, енді аялдап, ұзағырақ демалуға себеп көбейді.
