Емтихандар 10 тамызға дейін жалғасады. Дайындалуға уақыт қалмады – енді талапкерлер білімі мен жүйкесінің қаншалықты мықты екенін сынап көреді.
Кешенді тестілеуге тіркелу 1 маусым мен 8 шілде аралығында ҚР Ғылым және жоғары білім министрлігі Ұлттық тестілеу орталығының app.testcenter.kz сайтында өтті. Биыл талапкерлер 61 мыңнан астам өтініш берген. Салыстыру үшін, 2025 жылы олардың саны 51 мың болған. Талапкерлер көбіне «Педагогикалық ғылымдар», «Инженерлік, өңдеу және құрылыс салалары», сондай-ақ «Бизнес, басқару және құқық» бағыттарын таңдаған.
Ғылыми-педагогикалық магистратураға түсуге арналған кешенді тестілеу электронды форматта өтеді. Ол үш блоктан тұрады: шет тілінен тест, оқуға дайындығын анықтауға арналған тест және білім беру бағдарламалары тобының бейіні бойынша тест.
Тапсырмаларды орындауға 3 сағат 55 минут беріледі. Шекті нәтиже – 75 балл. Бұл ретте талапкер шет тілінен кемінде 25 балл, оқуға дайындығын анықтау тестінен кемінде 7 балл жинауы керек.
Бірінші және екінші бейіндік пәндердің әрқайсысынан да кемінде 7 балл алу қажет. Емтиханның бір бөлігін жақсы тапсыру жеткіліксіз – талапкер әр блок бойынша белгіленген шекті балды жинауы тиіс.
Бейіндік магистратураға түскісі келетіндер білім беру бағдарламалары тобының бейіні бойынша ғана тест тапсырады. Олар үшін шекті балл – 30. Бірінші бейіндік пәннен кемінде 7 балл, екінші пәннен де кемінде 7 балл жинау қажет.
Кешенді тестілеу нәтижесімен келіспеген талапкерлер емтихан аяқталғаннан кейін бірден онлайн-апелляция бере алады. Өтініш 7 жұмыс күні ішінде қаралады. Осыдан кейін сертификат Жеке кабинетте пайда болады.
2026 жылы магистратурада білім алуға шамамен 11 мың грант бөлінді. Олар мамандарға сұраныс жоғары даярлау бағыттары бойынша үлестіріледі.
Грант конкурсына қатысу үшін құжаттар 12–18 тамыз аралығында қабылданады. Грант иегерлерінің тізімі 25 тамызға дейін жарияланады. Болашақ магистранттарды жоғары және жоғары оқу орнынан кейінгі білім беру ұйымдарына қабылдау 28 тамызға дейін аяқталады.