Шығыс Қазақстан облысы Төтенше жағдайлар департаментінің құтқарушылары Үлкен Нарын ауданының Приморское ауылындағы жағажайды патрульдеу барысында «банан» үрлемелі су аттракционының аударылып қалғанын байқады.
Оқиға салдарынан құтқару кеудешелерін киген екі адам суға құлаған. Құтқарушылардың жедел әрі үйлесімді әрекеттерінің арқасында 1966 жылы туған әйел мен 2004 жылы туған жас жігіт дер кезінде судан шығарылып, жағаға аман-есен жеткізілді. Оларға медициналық көмек қажет болған жоқ.
ШҚО ТЖД су аттракциондарын пайдалану кезінде қауіпсіздік талаптарын қатаң сақтауды, нұсқаушылардың талаптарын орындауды және құтқару құралдарын пайдалануды ескертеді. Қырағылық пен қауіпсіздік ережелерін сақтау судағы жазатайым оқиғалардың алдын алуға көмектеседі.
