Республикалық зағип және нашар көретін азаматтарға арналған кітапханада Қабдеш Жұмаділовтің «Тағдыр» романының арнайы басылымы таныстырылды. Кітап Брайль қарпімен жарық көрді.
Таныстырылым барысында оқырмандарға шығарманың тарихи және көркемдік құндылығы туралы айтылды. Романда қазақ халқының тағдыры баяндалып, ұлттық болмыс, туған жерге деген сүйіспеншілік, бірлік пен отансүйгіштік тақырыптары қозғалады.
2026 жылы «Тағдыр» республикалық «Бір ел – бір кітап» акциясы аясында жалпыхалықтық оқуға таңдалды.
Романның Брайль қарпімен басылуы зағип және нашар көретін оқырмандардың әдебиетке қолжетімділігін арттырып, кітап оқуды насихаттауға және ұлттық әдеби мұраны сақтауға ықпал етеді. «Тағдырдың» осындай форматта жарық көруі кітапты баршаға қолжетімді ету жолындағы тағы бір маңызды қадам болды.