Алтай ауданының прокуратурасы тауар жеткізіп, жұмыс орындап, қызмет көрсеткенімен, ауданаралық ауруханадан ақысын ала алмаған 37 кәсіпкердің құқығын қорғады.
Заң бұзушылықтар мемлекеттік сатып алу туралы заңнаманың сақталуына жүргізілген талдау барысында анықталды. Прокуратура «Алтай ауданының ауданаралық ауруханасы» ШЖҚ КМК-ның жеткізушілер алдындағы мерзімі өткен берешекке жол бергенін анықтады.
Яғни, кәсіпкерлер өз міндеттемелерін орындаған, ал ақшасын уақытында алмаған. Кәсіпорын әлдебір себеппен жеткізушілер сәл күте тұрады деп шешкен. Алайда прокуратура мұндай ұстаныммен келіспеді.
Прокурорлық қадағалау актісі енгізілгеннен кейін аурухана 37 кәсіпкерлік субъектісінің алдындағы қарызын толық өтеді. Төлемдердің жалпы сомасы 106,47 миллион теңгені құрады.
Қабылданған шаралар кәсіпкерлердің құқықтарын қалпына келтіріп, мемлекеттік кәсіпорынның бизнес алдындағы міндеттемелерін орындауына мүмкіндік берді.
Прокуратура кәсіпкерлердің құқықтарын қорғау, мемлекеттік сатып алу саласындағы заңдылықты сақтау және қолайлы бизнес ахуалын қалыптастыру жұмыстың басым бағыттары болып қала беретінін атап өтті.
