Қазақстан Республикасының өнеркәсіп және құрылыс вице-министрі Қуандық Қажкенов Қытайдың САМСЕ инжиниринг корпорациясының өкілдерімен кездесті. Тараптар елдің коммуналдық инфрақұрылымын жаңғырту мәселелерін талқылады.
Қытай делегациясының құрамына корпорацияның вице-президенті Лю Шэнчэн мен Орталық Азия өңірі бойынша бас директоры Хань Сюэли кірді. САМСЕ өкілдері корпорацияның қызметі және әртүрлі елдерде инфрақұрылымдық жобаларды іске асыру тәжірибесі туралы айтты. Сондай-ақ сумен жабдықтау және су бұру нысандарын салу мен реконструкциялау жобаларын таныстырды.
Кездесудің негізгі тақырыбы Қазақстанның коммуналдық инфрақұрылымын жаңарту болды. Министрлік өкілдері энергетикалық және коммуналдық секторларды жаңғырту жөніндегі ұлттық жобаны таныстырды. Сонымен қатар кәріз тазарту құрылыстарын салу және реконструкциялау жұмыстары туралы баяндады.
Кездесуге Қазақстан Республикасы Өнеркәсіп және құрылыс министрлігі Құрылыс және тұрғын үй-коммуналдық шаруашылық істері комитеті төрағасының орынбасары Нұрсұлтан Керемқұлов және «Қазақстандық тұрғын үй-коммуналдық шаруашылығын жаңғырту және дамыту орталығы» АҚ басқарма төрағасының орынбасары Маққа Шыңғазиева қатысты.
Келіссөз қорытындысында тараптар коммуналдық инфрақұрылымды жаңғырту саласындағы алдағы ынтымақтастық жөнінде пікір алмасты.