Алматыда Қазақстан Республикасындағы IBI цифрлық экономика штабы жұмысын бастады. Жаңа халықаралық алаң Қазақстан мен Қытай арасындағы цифрлық экономика, электрондық коммерция, сауда, инвестиция, өнеркәсіптік кооперация және логистика салаларындағы ынтымақтастықты дамытуға бағытталған.
Штабтың ашылу рәсіміне сауда және интеграция вице-министрі Айдар Әбілдабеков қатысты. Сондай-ақ іс-шараға Қазақстан мен Қытайдың мемлекеттік органдарының, даму институттарының, ұлттық компаниялардың, қаржы секторы мен бизнес өкілдері келді. Ашылу рәсіміне барлығы 230-дан астам адам қатысты.
Штаб мемлекет, инвесторлар мен бизнесті бір алаңда біріктіруі тиіс. Оның негізгі міндеттерінің қатарында бірлескен жобаларды сүйемелдеу, электрондық коммерция мен цифрлық сервистерді дамыту, халықаралық серіктестерді тарту және трансшекаралық жеткізу тізбектерін құру бар.
Айдар Әбілдабеков Қазақстан мен Қытай стратегиялық экономикалық серіктестікті нығайтуды жалғастырып жатқанын атап өтті.
– 2025 жылдың қорытындысы бойынша Қазақстан мен Қытай арасындағы өзара сауда көлемі рекордтық 48,7 миллиард АҚШ долларына жетті. 2026 жылдың алғашқы бес айында тауар айналымы 22 миллиард долларды құрап, 27 пайызға өсті. Бүгінде алдымызда сауда көлемін арттырумен қатар, цифрландыру, өнеркәсіптік кооперацияны дамыту және заманауи өндірістік-логистикалық тізбектер құру арқылы оның сапасын жақсарту міндеті тұр, – деді Айдар Әбілдабеков.
Вице-министрдің айтуынша, IBI штаб-пәтерінің ашылуы халықаралық сауданың цифрлық инфрақұрылымын дамыту және инвестициялық ынтымақтастықты нығайту жолындағы маңызды қадам болды.
– Біз бұл жобаны Қытай бизнесінің Қазақстандағы қатысу аясын кеңейту ретінде ғана емес, еліміздің цифрлық экожүйесін дамытуға қосылған үлес деп қарастырамыз. Жаңа алаң мемлекет, бизнес және сарапшылар қауымдастығы арасындағы тиімді өзара іс-қимыл орталығына айналып, бірлескен жобаларды іске асыруға және заманауи цифрлық шешімдерді енгізуге мүмкіндік береді, – деді ол.
Қытай Қазақстанның ең ірі сауда және инвестициялық серіктестерінің бірі болып қала береді. 2025 жылдың қорытындысы бойынша ҚХР-дан тартылған тікелей шетелдік инвестициялар көлемі 2,826 миллиард АҚШ долларына жетті. Бұл – екіжақты ынтымақтастық тарихындағы рекордтық көрсеткіш. 1993 жылдан бері қытайлық инвесторлар Қазақстан экономикасына 30,7 миллиард АҚШ долларынан астам қаржы салды.
Штаб базасында өнеркәсіптік кооперацияны, көлік-логистикалық жобаларды, инновациялық технологиялар мен өндірістерді жергіліктендіруді дамыту жоспарланған. Алаң компаниялардың Қазақстан мен Қытай нарықтарына шығуына да көмектесуі тиіс.
Негізгі бағыттардың бірі ірі инвестициялық жобаларды сүйемелдеу болмақ. IBI бастамасы жоғары технологиялық өндірістерді дамытуға бағытталған индустриялық жобаны 5-8 жыл ішінде кезең-кезеңімен іске асыруды көздейді.
Жобаны орналастыру үшін Жамбыл, Алматы және Қарағанды облыстарындағы, сондай-ақ «Қорғас» шекара маңы ынтымақтастығы халықаралық орталығы ауданындағы алаңдар қарастырылып жатыр.
Жоба аясында аумағы 10 000 му, шамамен 666 гектар болатын индустриялық парк құру жоспарланған. Ілеспе инфрақұрылымға екі миллиард АҚШ долларынан астам инвестиция тарту көзделіп отыр.
Жоба толық қуатына шыққаннан кейін экономикалық операциялардың жылдық көлемі 10 миллиард АҚШ долларынан асады деп күтіледі. Бірлескен кәсіпорынның жылдық табысы бір миллиард АҚШ долларынан астам болуы тиіс.
Бастапқы кезеңде ұйымдастырушылар 1 000-нан астам тікелей жұмыс орнын ашуды жоспарлап отыр. Кейін жоба тікелей және сабақтас салаларда 10 000-нан астам адамды жұмыспен қамтуы мүмкін.
Индустриялық паркке зәкірлік резиденттер ретінде бес пен 10 аралығындағы жетекші салалық компания мен ірі өңдеу өндірісін тарту көзделген.
