Шығыс Қазақстан облысының Ұлан ауданында «Таза Қазақстан» республикалық бағдарламасы аясында «Таза жағалау» экологиялық акциясы ұйымдастырылды. Таврия ауылдық округінде өткен шара жастардың экологиялық мәдениетін қалыптастырып, қоршаған ортаға ұқыпты қарауға үндеді.
Акцияның ашылу салтанатында жергілікті кәсіпкер Бақытбек Исханов пен Ұлан ауданының ішкі саясат бөлімінің «Жастар ресурстық орталығы» КММ директоры Бауыржан Биғалиев сөз сөйледі. Олар туған өлкенің тазалығын сақтау, қоршаған ортаны қорғау және жастардың қоғамдық маңызы бар бастамаларға белсенді қатысуы маңызды екенін атап өтті.
Экологиялық акцияға «Жасыл ел» жастар еңбек жасақтарының 50 сарбазы қатысты. Олар көл жағалауы мен оған іргелес аумақты тұрмыстық қоқыстан тазартты. Шара қорытындысында 1 гектар жер тазаланып, 300 қап қоқыс жиналды. Жұмысқа екі арнайы техника жұмылдырылды.
«Таза жағалау» акциясы туған өлкенің табиғатын сақтауға және жастардың экологиялық жауапкершілігін арттыруға қосылған кезекті үлес болды. Мұндай бастамалар экологиялық мәдениетті қалыптастырып, қоршаған ортаға ұқыпты қарауға тәрбиелейді және тұрғындарды өңірдің тазалығы мен көркеюі жолындағы ортақ мақсатқа жұмылдырады.
