Шомылу маусымы қызған кезеңде су айдындарындағы азаматтардың қауіпсіздігін қамтамасыз ету мәселесі прокуратура органдарының ерекше бақылауында.
2026 жылғы 16 шілдеде «Заң мен тәртіп» идеологиясын іске асыру аясында Алтай ауданының прокуратурасы мүдделі мемлекеттік органдармен бірлесіп, жергілікті су айдындарының жағалауында ауқымды профилактикалық рейд өткізді.
Іс-шараның негізгі мақсаты – судағы жазатайым оқиғалардың алдын алу, тұрғындардың құқықтық мәдениетін арттыру және қауіпсіздік талаптарын сақтауға жауапкершілікпен қарауды қалыптастыру.
Рейд барысында мобильді топ мүшелері демалушылармен түсіндіру жұмыстарын жүргізіп, судағы қауіпсіз жүріс-тұрыс қағидаларын, шомылу кезінде сақталуы тиіс сақтық шараларын егжей-тегжейлі түсіндірді. Сонымен қатар ата-аналарға кәмелетке толмаған балаларды ересектердің қарауынсыз қалдыруға болмайтыны ескертіліп, олардың қауіпсіздігі үшін тұрақты бақылаудың маңыздылығы айтылды.
Сондай-ақ азаматтарға қоғамдық қауіпсіздікті қамтамасыз ету саласындағы қолданыстағы заңнама талаптары түсіндіріліп, қауіпсіздік ережелері көрсетілген ақпараттық жадынамалар таратылды.
Шығыс Қазақстан облысының прокуратурасы өңір тұрғындары мен қонақтарын су айдындарында қауіпсіздік талаптарын қатаң сақтауға шақырады. Сақтық шараларын елемеу орны толмас қайғылы жағдайларға әкелуі мүмкін екенін есте сақтаңыз. Өз өміріңіз бен денсаулығыңызға, сондай-ақ жақындарыңыздың қауіпсіздігіне жауапкершілікпен қарау – баршаға ортақ міндет.
