Зайсан ауданының криминалдық полиция қызметкерлері жедел-іздестіру іс-шараларының нәтижесінде өңір аумағында мал ұрлығымен айналысқан төрт күдіктіні қолға түсірді.
Тергеу барысында күдіктілердің еркін жайылымда жүрген 33 бас жылқыны ұрлағаны анықталды. Жәбірленуші – жергілікті тұрғын. Келтірілген материалдық шығын 30 миллион теңгеден асады.
Полиция қызметкерлерінің жедел әрекеттерінің арқасында ұрланған мал табылып, заңды иесіне толықтай қайтарылды.
Сондай-ақ, тергеу барысында ұсталғандардың тағы бір қылмысқа қатысы бар екені белгілі болды. Атап айтқанда, ағымдағы жылдың мамыр айында олар сол азаматтың 30 бас жылқысын ұрламақ болған. Алайда, қылмыстық әрекеттері дер кезінде байқалып, мал иесіне қайтарылған болатын.
Қазіргі таңда қажетті тергеу амалдары жүргізіліп жатыр. Күдіктілердің өңірде орын алған басқа да осыған ұқсас қылмыстарға қатысы бар-жоғы тексерілуде.
Шығыс Қазақстан облысын Полиция департаменті мал иелеріне сақтық танытып, жайылымдағы малды бақылауда ұстауға, малды идентификациялау құралдарын қолдануға және мал жоғалған жағдайда полицияға дереу хабарлауға кеңес береді.
Дер кезінде хабар беру – қылмыстың ізін суытпай ашуға және мүлікті иесіне қайтаруға мүмкіндік береді.
