Абай облысындағы «Семей орманы» мемлекеттік орман табиғи резерватының аумағында өрт шықты. Қауіпсіздік мақсатында маңайдағы балалар лагерінен тәрбиеленушілер эвакуацияланды.
Өрт 16 шілде күні таңертең резерваттың Бородулиха филиалына қарасты Камышенка орманшылығында тіркелді. Мектеп жанындағы лагерьде демалып жатқан 190 бала қауіпсіз жерге көшірілді.
Тілсіз жауды ауыздықтауға мемлекеттік орман күзетінің қызметкерлері, төтенше жағдайлар департаментінің бөлімшелері, арнайы техника мен авиация жұмылдырылған. Оқиға орнында 30 құтқарушы, орманшылар, автоцистерналар, тракторлар және шағын орман өртін сөндіру кешені жұмыс істеп жатыр.
Әуеден жалынды ауыздықтауға су төгу құрылғыларымен жабдықталған «Қазавиаорманқорғау» РМК-ның AS350 және Ми-8 тікұшақтары, авиациялық өртке қарсы қызметтің төрт десантшысы тартылған.
— Қазіргі уақытта орман өртін оқшаулау және толық сөндіру жұмыстары жалғасып жатыр. Жағдай бақылауда, — деп мәлімдеді «Семей орманы» мемлекеттік орман табиғи резерватының өкілдері.
Мамандардың айтуынша, өртті сөндіру жұмыстарына ауа температурасының +34 градусқа дейін көтерілуі және өрт қаупінің V (ең жоғары) класының сақталуы қиындық туғызуда. Солтүстік-батыстан соққан желдің жылдамдығы секундына 4 метрді, екпіні 8 метрге дейін жетеді.