Ішкі істер министрлігі ата-аналарды су жағасында демалған кезде балаларды мұқият қадағалауға шақырды. Суға шомылу маусымы басталғалы еліміздің су айдындарында 69 бала суға кеткен.
Министрлік жазатайым оқиғаларды талдап, қайғылы жағдайлардың көбі шомылуға жабдықталмаған жерлерде болатынын анықтады. Жабайы жағажайларда су түбі тексерілмейді. Онда тас, қоқыс, иірімдер мен ағысы қатты учаскелер болуы мүмкін.
Балалардың қаза болуына ересектердің жауапсыздығы да себеп болып отыр. Кейбір ата-аналар демалыс кезінде спирттік ішімдіктерді шамадан тыс қолданып, балаларын су жағасында қараусыз қалдырады. Мұндай жағдайда қайғылы оқиғаның болуына бірнеше минут қана жеткілікті.
ІІМ Профилактикалық қызметті үйлестіру комитетінің төрағасы Арман Саданов ата-аналарға негізгі қауіпсіздік ережелерін еске салды.
– Құрметті ата-аналар! «Заң және Тәртіп» қағидатын іске асыру аясында Ішкі істер министрлігі жазатайым оқиғаларға талдау жүргізді. Су айдындарында балалардың қаза болуы ерекше назар аударуды талап етеді. Күн ысыған кезде көптеген баланың уақытын өзендер мен көлдердің жағасында өткізетіні жасырын емес. Суға шомылу маусымы басталғалы су айдындарында 69 бала суға кетті. Жазатайым оқиғалар көбіне шомылуға жабдықталмаған жерлерде болады. Балалар су түбі тексерілмеген, иірімдері мен ағысы қатты жабайы жағажайларда жиі шомылады. Сонымен қатар демалыс кезінде ересектердің спирттік ішімдіктерді шамадан тыс қолдануы салдарынан балалар жағалауда тиісті бақылаусыз қалып, қайғылы жағдайға тап болады. Қолданыстағы заңнамада тыйым салынған жерлерде шомылғаны үшін әкімшілік жауапкершілік қарастырылғанын еске саламыз. Бұл ӘҚБтК-нің 364-бабында көзделген. Жыл басынан бері 2700-ден астам құқық бұзушы жауапқа тартылды, – деді Арман Саданов.
ІІМ су айдындарында қарапайым қауіпсіздік ережелерін қатаң сақтауды ұсынады:
- шомылуға жабдықталмаған жерлерге түспеу;
- су айдындарының маңында демалған кезде балаларды үнемі бақылап, қараусыз қалдырмау;
- балаларға бейтаныс жерде қатты ағыс, тас пен қоқыс, суасты иірімдері секілді қауіптер болуы мүмкін екенін түсіндіру;
- аптап ыстықта суық суға түспеу. Температураның күрт өзгеруі қан тамырларының түйілуі мен құрысуға әкелуі мүмкін.
Тыйым салынған жерлерде шомылғаны үшін ӘҚБтК-нің 364-бабы бойынша әкімшілік жауапкершілік қарастырылған. Жыл басынан бері 2700-ден астам құқық бұзушы жауапқа тартылды.
Ата-аналар өзендер мен көлдердің маңында балаларын үнемі қадағалап, шомылуға арналған жабдықталған орындарды ғана таңдауы керек. «Ештеңе бола қоймас» деген әдеттегі немқұрайлылық бұл жерде тым қымбатқа түсуі мүмкін.