14–15 шілдеде Қостанайдағы Allur өндірістік алаңында Қазақстанның автомобиль өнеркәсібі кәсіпорындарын роботтандыру және өнеркәсіптік автоматтандыру мәселелеріне арналған халықаралық ғылыми-практикалық семинар өтті.
Қатысушылар отандық кәсіпорындарға роботтарды енгізуді қалай жеделдетуге болатынын, ғалымдар мен өндіріс мамандары арасындағы тиімді байланысты жолға қоюды, сондай-ақ ғылыми әзірлемелерді зертханалардан нақты өндірістік цехтарға енгізу мәселелерін талқылады.
Семинардың негізгі тақырыбы «Жасанды интеллект негізінде Қазақстанның автомобиль өнеркәсібі кәсіпорындарын икемді роботтандыру және өнеркәсіптік автоматтандыруға (RPA) арналған роботтарды, ғылыми-техникалық және бағдарламалық қамтамасыз етуді әзірлеу» ғылыми-техникалық бағдарламасының аралық нәтижелері болды.
Бағдарламаны академик Ө. А. Жолдасбеков атындағы Механика және машинатану институты «Тұран» университетімен, Allur компаниялар тобымен және Қазақстан Республикасының Ұлттық инженерлік академиясымен бірлесіп жүзеге асырып жатыр. Жобаға Қытай мен Италияның жетекші ғылыми ұйымдары мен сарапшылары да тартылды.
Семинарда отандық бес мобильді және өнеркәсіптік роботтың тәжірибелік үлгілері таныстырылды. Әзірлеушілер оларды нақты өндірістік жағдайда жұмыс істеуге бейімдеп жасаған.
Роботтар цех ішіндегі логистикалық жұмыстарды атқара алады, бөлшектерді тасымалдайды, нүктелік дәнекерлеу жүргізеді және автомобиль шанағының элементтерін таңбалайды. Қатысушыларға олардың жұмысы тікелей өндіріс барысында көрсетілді.
Қостанайда автоматтандыру, роботтандыру және жасанды интеллект технологиялары саласындағы Құзыреттер орталығы да ашылды. Бұл R&D-орталық Allur компаниясымен бірлесіп құрылып жатыр.
Жаңа алаң ғылыми зерттеулер мен өндірістік тәжірибені тоғыстырады. Орталық мамандары инженерлік шешімдерді әзірлеумен, оларды өнеркәсіп кәсіпорындарына енгізумен және жоғары білікті инженер кадрларды даярлаумен айналысады.
Жоба ғылым мен өндіріс арасындағы байланысты нығайтып, қазақстандық ғалымдардың әзірлемелерін коммерцияландыруға көмектесуі тиіс. Бұл бағыттар ұлттық экономиканың бәсекеге қабілеттілігін арттыру жөніндегі стратегиялық міндеттерге сәйкес келеді.
Ғылыми-техникалық бағдарлама аясындағы жұмыс жалғасады. 2026 жылғы 16 шілдеде Алматыдағы «Тұран» университетінде Қытай ғылым академиясының Шэньян автоматтандыру институтының профессорлары Люй Пэн мен Чан Юнның қатысуымен халықаралық ғылыми семинар өтеді.
Ғалымдар роботтарды басқару жүйелерінің архитектурасы, кинематикалық модельдеу әдістері және заманауи робототехника технологиялары туралы баяндамалар ұсынады.