Қазақстанның еңбек нарығы мамырдағы бәсеңдеуден кейін маусым айында айтарлықтай жанданды. Enbek.kz Электрондық еңбек биржасында жұмыс берушілер 108,7 мың бос жұмыс орнын жарияласа, жұмыс іздеушілер 126,7 мың түйіндеме орналастырды. Мамырмен салыстырғанда бос жұмыс орындарының саны 25,4%-ға, ал түйіндемелер саны 38,3%-ға өсті. Жұмыс іздеушілер саны әлі де жұмыс берушілер ұсынған орындардан көп болды.
Белсенділіктің артуы мамыр мерекелері кезіндегі маусымдық бәсеңдеуден кейін нарықтың қалпына келуімен байланысты. Бұған қоса, маусымда оқу орындарының түлектері еңбек нарығына шықты. Соның нәтижесінде жұмыс күшінің ұсынысы айтарлықтай артты.
Ең көп маман білім беру саласына қажет болды. Бұл бағытта жұмыс берушілер 19,2 мың бос жұмыс орнын ұсынды. Өзге де қызмет түрлерін көрсету саласында 16,5 мың, ауыл, орман және балық шаруашылығында 12,1 мың ұсыныс жарияланды. Денсаулық сақтау және әлеуметтік қызмет көрсету саласына 9,5 мың, құрылысқа 8,4 мың, өңдеу өнеркәсібіне 7,3 мың бос жұмыс орны тиесілі болды.
Өңірлер арасында бос жұмыс орындарының саны бойынша Түркістан облысы көш бастады. Мұнда 12,3 мың ұсыныс жарияланды. Астанада жұмыс берушілер 8,5 мың, Жамбыл облысында 7 мың, Қарағанды облысында 6,7 мың бос жұмыс орнын ұсынды.
Сұраныс құрылымында орта деңгейдегі біліктілікті қажет ететін жұмыс орындары мен біліктілігі төмен еңбекке деген сұраныс іс жүзінде теңесті. Осы санаттардың әрқайсысына барлық ұсыныстың 37–38%-ы тиесілі. Мұндай көрсеткіш ауыл шаруашылығы мен құрылыста жұмысшы мамандарға деген маусымдық сұраныстың өсуімен байланысты. Бос жұмыс орындарының 25%-ында жоғары білікті мамандар қажет.
Жұмыс іздеушілер арасында жастардың белсенділігі жоғары болды. 35 жасқа дейінгі үміткерлер барлық түйіндеменің 49%-ын жариялады. Бұл алдыңғы айлармен салыстырғанда айтарлықтай жоғары көрсеткіш. Бұған оқу орындары түлектерінің еңбек нарығына шығуы да әсер етті. 35 пен 44 жас аралығындағы жұмыс іздеушілердің үлесі 25%, 45 пен 54 жас аралығындағылардың үлесі 17%, ал 55 жастан асқандардың үлесі 9% болды. Жұмыс іздеушілердің 55%-ын әйелдер, 45%-ын ерлер құрады.
Біліктілік деңгейі бойынша жұмыс күшінің ұсынысы жалпы алғанда жұмыс берушілердің сұранысына сәйкес келеді. Түйіндемелердің 37%-ы орта деңгейдегі білікті мамандарға, 33%-ы жоғары білікті үміткерлерге, 30%-ы біліктілігі төмен жұмыс іздеушілерге тиесілі.
Маусымда жарияланған бос жұмыс орындарының ішінде ең жоғары жалақы дивизион директорына ұсынылды – ≈1,98 миллион теңге. Басқарма бастығының орынбасарына ≈1,38 миллион теңге, ұңғыма инженеріне ≈1,31 миллион теңге төлеуге дайын болған.
Ал жұмыс іздеушілердің жалақыға қатысты талабы бұдан да жоғары болды. Пилот қызметіне үміткерлер ≈3,4 миллион теңге, жүйелік сәулетшілер ≈2,5 миллион теңге, хирург дәрігерлер ≈2 миллион теңге жалақы алуды көздеген.
Маусым айындағы мәліметтер мамырдағы бәсеңдеуден кейін платформадағы іскерлік белсенділіктің қалпына келгенін көрсетеді. Сұраныс пен ұсыныс жыл басынан бергі ең жоғары деңгейге жетті. Жұмыс берушілерге негізінен әлеуметтік салада, қызмет көрсету секторында және маусымдық салаларда мамандар қажет. Ал жұмыс іздеушілер арасында жастардың, соның ішінде оқу орындары түлектерінің белсенділігі айтарлықтай өсті.
Жыл басынан бері платформада 604,4 мың бос жұмыс орны мен 736 мың түйіндеме жарияланды.
