Катонқарағай ауданында 10 және 11 шілде күндері өтетін «Алтай – түркі әлемінің алтын бесігі» халықаралық фестиваліне соңғы дайындық жұмыстары пысықталуда. Таяу күндері Шығыс Қазақстан облысының ең көрікті жерлерінің бірі түркі халықтары өкілдерінің, әлемдік деңгейдегі өнерпаздар мен мыңдаған қонақтардың бас қосатын мекеніне айналады. Алтай бұл күндері адамдарды тек асқар тауларымен және таңғажайып табиғатымен ғана емес, ортақ тарихымен де біріктіре алатынын тағы бір мәрте дәлелдемек.
Алғашқы іс-шаралар бүгін кешке басталады. Ауқымды мәдени бағдарламаның шымылдығын додаға түсетін айтыс ашады.
Дегенмен, негізгі қызықтың бәрі ертең болады. Қонақтарды поэзия кештері, ұлттық спорт түрлері (бәйге мен көкпар), этномәдени жобалар, қолөнершілер көрмесі, ұлттық тағамдар және халықаралық деңгейдегі әртістердің қатысуымен өтетін концерттік бағдарлама күтеді.
Фестивалдің басты ерекшелігі – түркі әлемінің қастерлі символы саналатын мифтік ақ қанатты пыраққа арналған театрландырылған қойылым болмақ.
Ашылу салтанатында көрермендер назарына арнайы театрландырылған хореографиялық композиция ұсынылады. Онда келесі тақырыптар көркем тілмен баяндалады:
* Жылқы баласының адамзат өркениетінің дамуындағы рөлі;
* Көшпенділер мәдениетін қалыптастырудағы маңызы;
* Ұлы дала тарихының тұлпармен байланысы және оның түркі халықтарының рухани әлеміндегі киелі орны.
Сахналық туынды көрерменді мыңжылдықтар қойнауына жетелеп, жылқы малының адам өмірі мен мәдениетінің өркендеуіне қаншалықты орасан зор ықпал еткенін көрсетеді.
Шараның басты музыкалық оқиғасы – халықаралық гала-концерт. Кештің басты хедлайнері – әлемге танымал қазақстандық әнші Димаш Құдайберген. Ұйымдастырушылардың уәдесіне сүйенсек, ол көрермендерге бір сағаттық ұмытылмас концерт сыйлайды.
Сонымен қатар сахна төрінде өнер көрсететін шетелдік және отандық жұлдыздар:
* Қазақстаннан – «Сармат» тобы;
* Қарақалпақстаннан – Ербай Ниязов;
* Әзірбайжаннан – Эфенди;
* Өзбекстаннан – Севара Хантуланова;
* Қырғызстаннан – JAX (Джакс);
* Венгриядан – Nox тобы;
* Түркиядан – Мурат Япрак;
* Башқұртстаннан – «Хазина» тобы;
* Моңғолиядан – Субейди Самдум және «От» тобы;
* Тыва Республикасынан – Айзана.
Әртүрлі елдерден келген өнерпаздар ортақ түркі мәдениетінің байлығын паш етіп, көрермендерге ауқымды музыкалық кеш тарту етеді.
«Алтай – түркі әлемінің алтын бесігі» фестивалі мәдениеттер тоғысып, бауырлас халықтар арасындағы байланыстар нығаятын халықаралық алаңға айналмақ.
Шараның басты мақсаты – түркі халықтарының ортақ тарихи тамырын дәріптеу, мәдени ынтымақтастықты дамыту және Алтайдың туристік әлеуетін халықаралық деңгейде ілгерілету.
Көз тартар Катонқарағай табиғатының аясында өтетін бұл фестиваль ұлттық дәстүрлер мен заманауи мәдениетті ұштастырып, бүкіл түркі әлемінен жиналған мыңдаған қонақтар мен қатысушылардың басын қосады.