Шығыс Қазақстан облысындағы Осинов асуында зақымданған көпір қалпына келтіліп, бүгін таңғы 06.00-де қозғалыс қайта ашылды.
30 маусым күні ұзаққа созылған нөсер жауын-шашынның салдарынан Өскемен-Алтай-Үлкен Нарын-Катонқарағай-Рахман қайнары тасжолының 64-шақырымында орналасқан Пихтовка өзені арқылы өтетін көпірге зақым келген болатын. Соның салдарынан тасжолдың 6-66-шақырым аралығында бір оське түсетін жүктемесі 6 тоннадан асатын жүк көліктерінің қозғалысына уақытша шектеу енгізілген еді.
«ҚазАвтоЖол» ҰК» АҚ ШҚО филиалы Пихтовка өзені арқылы өтетін көпірде жүргізілген апаттық-қалпына келтіру жұмыстарының аяқталғанын хабарлады.
— Мамандар зақымданған тіректі қалпына келтіріп, бұрын бөлшектелген көпір элементтерін қайта орнатты. Сонымен қатар алдағы уақытта осындай жағдайлардың алдын алу мақсатында беткейлерден суды ұйымдасқан түрде бұруға арналған қосымша су бұру науалары орнатылды. 8 шілде күні сағат 06:00-ден бастап көпір арқылы көлік қозғалысы толық көлемде қайта ашылды, — делінген ақпаратта.