Облыстық полиция департаменті баспасөз қызметінің мәліметіне сүйенсек, туристік маусым қарсаңында Алакөл жағалауына апаратын республикалық маңызы бар «Омбы-Майқапшағай» тасжолының Жарма ауданы Қалбатау ауылы маңында жүргізушілерге арналған инновациялық визуалды бағдарлау жүйесі іске қосылды.
— Жаңа қондырғы жолдың үстіне және тікелей жол жамылғысына жарқын лазерлік сәулелерді проекциялап, жол қозғалысына қатысушылар үшін қосымша бағдар қалыптастырады. Бұл жүргізушілерге түнгі уақытта, тұман, жаңбыр немесе түтін сияқты қолайсыз ауа райы жағдайларында жол бағытын жақсырақ көругк мүмкіндік береді, — делінген ақпаратта.
«Омбы-Майқапшағай» тасжолы Қазақстан, Ресей мен Қытай арасындағы жүк және жолаушы тасымалын қамтамасыз ететін халықаралық көлік дәлізіне кіреді. Жаз мезгілінде Алакөлге баратын туристер ағынының артуына байланысты бұл бағытта қозғалыс қарқындылығы айтарлықтай көбейеді.
— Лазерлік жүйені қолдану жол қозғалысы қауіпсіздігін арттырып, апаттық жағдайлардың туындау қаупін азайтып, жүргізушілер үшін қолайлы жағдай жасауға мүмкіндік береді, — делінген хабарламада.