Өскемен қаласындағы негізгі көшелердің бірі – Әуезов даңғылында абаттандыру жұмыстары жалғасуда. Аталмыш даңғылдағы жаңғырту жұмыстары жылы маусым басталысымен қолға алынған болатын. Қазіргі уақытта бірнеше тұрғын үйдің қасбетін әрлеу және оларды бірыңғай үлгідегі балкондармен жабдықтау жұмыстары аяқталуға жақын.
Бүгінде даңғыл бойында жаяу жүргіншілер жолына тротуар плиталарын төсеу жұмыстары жүргізілуде.
– Қазіргі таңда плиталардың негізгі бөлігі Ауған соғысы ардагерлеріне арналған ескерткіштен бастап Крылов көшесімен қиылысқа дейінгі аралықта төселді. Жұмыстарды 1 тамызға дейін толық аяқтау жоспарланып отыр, – деп хабарлады қалалық әкімдіктен.
Абаттандыру барысында шаһарға тән бірыңғай сәулеттік стиль сақталған. Сонымен қатар «Прогресс» дүкені маңына гүлдер егілген сәндік құмыралар орнатылды. Жүргізіліп жатқан жұмыстар қаланың көркіне көрік қосып, тұрғындар үшін қолайлы әрі заманауи қоғамдық кеңістік қалыптастыруға бағытталған.