Өскемен қаласының Space командасы 13-14 маусым күндері Астанада өтіп жатқан эстетикалық топтық гимнастикадан Әлем кубогы мен Азия чемпионатында Шығыс Қазақстан облысының намысын абыроймен қорғады.
«Жасөспірімдер» санатында өнер көрсеткен спортшылар жарыстың алғашқы күнінің қорытындысы бойынша аралық есепте бесінші орынға тұрақтап, құрлықтың ең мықты командалары арасында жоғары дайындық деңгейі мен сенімді өнерін көрсетті.
Өскемендік жас гимнаст қыздар үшін мұндай ауқымдағы турнирге қатысу алғашқы халықаралық тәжірибе болды. Қатаң бәсекеге қарамастан, команда өздеріне жүктелген міндетті сәтті орындап, өңірдің беделін халықаралық деңгейде лайықты таныта білді.
Эстетикалық топтық гимнастикадан Азия чемпионаты екі жылда бір рет өткізіледі. Биыл құрлықтық дода тарихында алғаш рет Қазақстанда ұйымдастырылып отыр. Бұл елімізде аталған спорт түрін дамыту жолындағы маңызды оқиға.
Байрақты бәсекеге Қазақстан, Беларусь, Қырғызстан, Малайзия, Ресей, Сингапур, АҚШ, Финляндия, Эстония және Жапония елдерінің командалары қатысып жатыр. Жалпы турнирге спортшыларды, жаттықтырушыларды, төрешілерді және ресми делегация өкілдерін қоса алғанда 400-ден астам адам жиналды.