Шығыс Қазақстан облысының әкімі Нұрымбет Сақтағанов Зайсан ауданына жасаған жұмыс сапары барысында Қаратал ауылында салынып жатқан дәрігерлік амбулаторияға барды.
Бүгінде құрылыс жұмыстары 99 пайызға аяқталған. Бас мердігер — «СМУ Шығыс» ЖШС. 4 мыңға жуық адамға қызмет көрсететін медициналық мекемеде 2 дәрігер мен 15 медбике жұмыс істейді.
Барлық қажетті инженерлік коммуникациялар осы аптада толық қосылады деп күтілуде. Одан кейін медициналық құрал-жабдықтар жеткізіліп, мекеме науқастарды қабылдауға толық дайын болады.
«Ауылдарда жаңа дәрігерлік амбулаториялардың салынуы Мемлекет басшысы Қасым-Жомарт Тоқаевтың халықты сапалы әрі қолжетімді медициналық қызметпен қамтамасыз ету жөніндегі тапсырмалары аясында атқарылып жатқан жұмыстардың бір бөлігі. Облысымызда заманауи медициналық нысандар салумен қатар, білікті мамандарды тарту, оларға қолайлы жағдай жасау мәселелеріне де ерекше көңіл бөлініп келеді», — деді аймақ басшысы.
Одан соң Нұрымбет Сақтағанов Үлкен Қаратал ауылындағы жаңа мектеп құрылысының барысымен танысты.
150 оқушыға арналған білім ордасы жаңа оқу жылының басында пайдалануға беріледі деп жоспарланып отыр.
Қазіргі уақытта негізгі құрылыс аяқталып, ішкі әрлеу жұмыстары жүргізіліп жатыр. Облыс әкімі барлық жұмысты сапалы әрі белгіленген мерзімде аяқтау міндетін қойды.