Облыстық Төтенше жағдайлар департаментінің мамандары өңір тұрғындары жиі баратын демалыс орындарының бірі — Сібе көлдерінде шомылудың қаупі бар екенін мәлім етті. Сырт көзге тынық көрінетін суда барынша абай болған жөн.
— Сібе көлдерінде жерасты бұлақтары бар және кей жерлерінің тереңдігі 40 метрден асады. Сондықтан бұл көлдерді толықтай қауіпсіз деуге болмайды, — деп хабарлады ведомство өкілдері.
Сонымен қатар құтқарушылар қауіпсіздік талаптарын қатаң сақтап, тек арнайы жабдықталған орындарда шомылу қажеттігін атап өтті.
— Көлдерде арнайы қоршалған жағажайлар мен ұйымдастырылған демалыс аймақтары бар. Егер тек сол орындарда шомылса, қауіп айтарлықтай азаяды, — делінген ақпаратта.
Өскемен қаласы аумағындағы Үлбі мен Ертіс өзендері де шомылуға қауіпті су айдындарының қатарында. Бұған негізгі себеп — ағынның қатты болуы.
— Қала маңында толықтай қауіпсіз су айдындары жоқ. Үлбі мен Ертісте ағыс өте қатты, сондықтан суға түсу аса қауіпті, — деп ескертті ТЖД мамандары.