Шығыс Қазақстан облысында тәртіп сақшылары 26-29 наурыз аралығында «Қауіпсіз үй» рейдтік іс-шарасын жүргізді. Оған полиция қызметкерлерінен бөлек, жергілікті атқарушы органдар мен үкіметтік емес ұйымдардың өкілдері жұмылдырылды.
Шараның негізгі мақсаты — отбасылық-тұрмыстық саладағы құқық бұзушылықтардың алдын алу, әйелдер мен балалардың құқықтарын қорғау, қиын жағдайға тап болған отбасыларды анықтау.
— Соның барысында есепте тұрған 750-ден астам адам тексерілді. Жалпы алғанда, 420 әкімшілік құқық бұзушылық, оның ішінде отбасылық-тұрмыстық жанжалдар, тыныштықты және қоғамдық тәртіпті бұзу фактілері анықталды. Өмірлік қиын жағдайдағы 9 отбасы тіркелді. Онда 19 бала тәрбиеленіп жатыр. Оларға құқықтық, психологиялық және әлеуметтік көмек көрсетіліп, уәкілетті органдарға тиісті хабарламалар жолданды, — деп хабарлады ШҚО Полиция департаментінен.
Айта кетейік, «Қауіпсіз үй» шарасында тек заңбұзушылықтарды анықтау ғана емес, мұқтаж отбасыларға жан-жақты қолдау көрсету көзделген.