Шығыс Қазақстандағы екі айдың әлеуметтік-экономикалық көрсеткіштері талқыланды

Бүгін Шығыс Қазақстан облысы әкімдігінде өткен жиналыста 2026 жылдың қаңтар-ақпан айларындағы өңірдің әлеуметтік-экономикалық даму көрсеткіштері талқыға салынған жиналыс өтті. Оған аймақ басшысы Нұрымбет Сақтағанов, басқарма басшылары мен қала, аудан әкімдері қатысты.
ШҚО экономика және бюджеттік жоспарлау басқармасының басшысы Нұрсұлтан Маратов баяндама жасап, соңғы көрсеткіштерді айтып берді.
«Екі айдағы жеке инвестициялар көлемі 80 млрд теңгеге жуықтайды деп болжанып отыр. Ауыл, орман және балық шаруашылығының жалпы өнімі 30 млрд теңгеден аспақ. Сондай-ақ көтерме сауда, бөлшек сауда мен құрылыс жұмыстарының көлемі өседі деп күтілуде», — деді ол.
Пайдалануға берілетін тұрғын үй көлемі 11,5 мың шаршы метрді құрап, өсім 103% деңгейінде болмақ. Ал өңдеу өнеркәсібінде 380 млрд теңгеден асатын өнім өндірілуі ықтимал. Яғни, жоспар толық орындалмайды деп күтілуде.
Облыс әкімі көрсеткіштерді орындамай жатқан әр қала, аудан әкіміне ескерту жасап, бұл бағыттағы жұмыс қарқынын күшейту қажеттігін айтты.
«Ауыл шаруашылығы басқармасы қала және аудан әкімдерімен бірлесіп агроөнеркәсіптік кешен саласындағы инвестициялық жобаларды іске асыруды жеделдетуі тиіс. Сондай-ақ әкімдер мемлекеттік сәулет-құрылыс бақылауы, құрылыс, сәулет және қала құрылысы басқармаларымен бірлесіп, жоспарланған құрылыс жұмыстары көлеміне қол жеткізуді қамтамасыз етуі керек», — деді Нұрымбет Сақтағанов.