Еске салсақ, оқиға Тәуелсіздік даңғылы, 12 мекенжайында болған. Көпқабатты тұрғын үйдің шатырынан сырғыған мұз сол маңнан өтіп бара жатқан зейнеткерге құлаған.
Бұны терезеден көрген үй тұрғындарының бірі жедел жәрдем шақырған.
Риддер қаласында мұздың шатырдан құлауы мәселесі жыл сайын қайталанады. Бірнеше жыл бұрын осындай жағдай адам өліміне әкеліп соққан болатын. Мұз құлаған көпқабатты тұрғын үйде 140 пәтер бар. Тұрғындардың айтуынша, үйде ПИК жоқ.
— Соның салдарынан шатыр жүйелі тазаланбайды. Әсіресе ғимараттың тротуар бойындағы бөлігі қауіпті. Бұл жерден адам көп жүреді. Бірінші қабаттарда бірнеше дүкен орналасқан. Қазірдің өзінде жүрудің өзі қорқынышты, — дейді олар.
Қала әкімдігі шатырды тазалау үшін арнайы техника жіберілетінін хабарлады.
— Ортақ мүлікті күтіп-ұстау — тұрғын және коммерциялық нысан иелерінің міндеті екенін еске саламыз, — деп мәлімдеді ведомство өкілдері.
ШҚО денсаулық сақтау басқармасының хабарлауынша, зардап шеккен әйел Риддер қалалық ауруханасының травматология бөліміне жатқызылды. Жабық бас-ми жарақатын алған зейнеткердің миы шайқалған.